Naskah Upacara Adat 2026

NASKAH :

UPACARA ADAT HAJAT LAUT.

bissmilahirohmanirrohim... assalamu'alaikum wr. wb.

Lingkung Seni Liga Swara,

Seja Mintonkeun Upacara Adat Tradisi Sunda,

Dina Raraga Hajat Laut Rancabuaya Taun 2026.

Sumangga nyanggakeun...! 

BINARUNG RASA

Reup deungdeung sagara hideung

Indung peuting ngusik peuting

Angin peuting ngahariring

Méga miang ngondang beurang

Bray caang geura datang

Rék sumping Hyang Batari

Nu gaduh ieu Nagri

CIREBONAN

Patapan mulang sarakan

Pameuseuhan seuweu siwi

Canéom banyu sarébu

Di lawang sakéténg puri

Atma sukmaning ngahiji

Gapura konci panglawung

Ngaraga ngajadi hiji

Ngajaul mumbul ngahiang

Ngahiang jadi wangkingan

CANDRAWULAN

Waktu peuting sepi jempling

Basa bulan ngagupayan

Di panto wiati ngalong

Pucuk awi tingarulang

Nyéah lir lagu rumiang

Mapay darajat lumungsur

Ngagelar kari sukmana

Reup angin reureuh heula

Kula nepikeun béwara

Reg méga kandeg heula

Di dieu rék upacara

Rék mapag hyang batari 

Nu kagungan ieu nagri

PAYUNG

NGARAJAH

Amit sun ka Maha Agung

Neda widi ka Illahi

Pangraksa sadaya alam

Anu sipat Rohman Rohim

Walatra teu pilih bulu

Sadaya tunggal mahlukna

Dituturkeun ku alhamdu

Pinuji nu Maha Luhur

Panglesu rurumbu napsu

Nu sumurup dina kalbu

Nu suméré dina haté

Pasoléngkrah dina manah

Jail resep hiri dengki

Musnah, musnah, musnah (3x)

Turut kana dawuh Rosul

Taat ka sabda Pangéran

Dipungkas kalimah kalih

Syahadat dua lir sumpah

Jangji moal lanca linci

Udar tina tali gadang

(maca Syahadat)

PUCUNGAN

Srung-sreng 2x

Ua Léngsér, jalang jéléng

Soca serem bulang beléng

Singhoréng Ua herééng

Dubangplak 2x

Totopong barangbang semplak

Baju kutung enggeus ruksak 

Balas keuheul disasaak

Ua napsu sorot kejem

Lambey gurunyam gerenyem

Prang-pring 2x

Ua ginding maké samping

Omat nyanéh ulah nuding

Da lain meunang curaling

Dangdut 2x

Ua mawa koja butut

Punten ua nuju kalut

Jalaran modalna bangkrut

Nu diantos antos témbong

Nu dianti anti sumping

LUTUNG JIGRAH

Batur jenuk tos sami samiuk

Nu ditunggu gening enggeus cunduk

Para wargi nu sami garinding

Nu dianti anti sumping

Ua arék tandak tandang

Dina lagu kunang kunang

KUNANG-KUNANG

Dulur dulur, nu di lembur

Warga Ranca geus samakta

Hayu urang tasyakuran

Hajat laut babarengan

Laut kidul nu pinunjul

Mawa berkah méré hasil

Pakasaban saréréa

Keur warga Rancabuaya

Mugi mugi, ka Nu Agung

HNSI nu linuhung

Hajat laut nu lumangsung

Hirup huripna sing nanjung

Sakitu nu, kapihatur

Rancabuaya sing mamur

Omat ulah ukur catur

Syukur ka Nu Maha Gofur 

GULANG² + PENARI

NARATOR BUBUKA

KUM...

ASALAMU'ALAIKUM...

SAMPURASUN KANU NGARIUNG

NEDA WIDI KANU LINGGIH

SEJA MIRIG NU SUMPING

KEMPRANG MAPAG NU DATANG

BINARUNG KASINUGRAHAN

DINA RINÉKNA BUDAYA SUNDA

GAMELAN DIGEDER

Ua Léngsér, anteng ngajanteng

Hawar hawar ti béh anggang

Aya sora ngagalindeng

Ua tenang henteu bingung

Manggul utusan Sang Ratu

Ngemban sabda titah Raja

Ua nyorén koja kabuyutan

Warisan para karuhun

Berebet Ki Léngsér lumpat

Lumpat salumpat lampét

Éor cécékolannana 

Éar mumuncangannana

Nya irung ngalagu kidung

Kélék lagu écék écék

Babajég lagu bajigjag

Tarik batan mimis bedil

Lepas batan kuda lumpat

Kawas wawuh jeung lelembut

Wanda titisan Déwata

Dihias sutra déwangga

Durugdug muru ka kidul

Torojol anjog di kulon

Éjégélér beulah kalér

Tatan tatan beulah wétan

Kep sidakep sinuku tunggal

Lakuning kang mujasmédi

Neda widi Sang Batari

Mugia karep tinekanan

TAKOL CATRIK

"NEPUS SAJÉN"

Sateuacan dikawitan peryogi diuningakeun yén NEPUS SAJÉN téh nyaéta ngusulkeun jeung ngukurkeun persembahan atawa tanda panghormat nu dititip kana wadah sasajén candakeun ka laut, hal ieu mangrupi ciri budaya dina mipit amit ngala bébéja kanggo laut anu geus méré cukang lantaran datangna rejeki hakékatna ti Gusti Alloh Subhanahu Wa Ta'ala.

Salajengna mangga urang kawitan nu diawalan ku maca kalimah shayadat suci

"asyhadu an laa ilaaha illallaah wa asyhaduanna muhammadar rasuulullah"

ashadu sakateling hurip tés putih mulya badan wawayangan gusti rusul. pun nini neda paneda neda urug neda panangtayungan ti gusti hiyang widi... 

tok leut tok leut tok leut

mangga dihaturanan ka para pini sepuh anu disauran tiasa nyecep ku raga doa kana wadah sajén anu parantos di sayogikeun di payun

Data Nepus Saji :

(dipiwarang kapayun saurang-saurang teras mulih deui ka posisina masing masing)

1. BAPA CAMAT KEC. CARINGIN

2. BAPA KAPOLSEK KEC. CARINGIN

3. BAPA DANRAMIL CISEWU

4. BAPA POLAIR

5. IBU KEPALA DESA PURBAYANI

6. KETUA HNSI

7. KETUA RUKUN NELAYAN

8. PAK CEPI a.n Para Pedagang Wisata

9. PERWAKILAN PENGUSAHA KELAUTAN

10. UPT KELAUTAN KECAMATAN CARINGIN

11. BAPA ASEP HIDAYAT

12. KANG AÉN (salaku juru yuga)

13. BAH ASLIN (salaku juru yuga)